Заявление о конфиденциальности

1. UMUMIY QOIDALAR

1.1. “TISU Ijtimoiy fanlari va innavatsion pedagogika” jurnali — Respublikadagi ijtimoiy fanlar, pedagogika, psixologiya, sotsiologiya, falsafa va tarix yo‘nalishlarida izlanish olib borayotgan olimlar, doktorantlar va tadqiqotchilar, Oliy ta’lim muassasalari professor-o‘qituvchilari, ilmiy izlanuvchilar hamda magistrantlar, maktab va texnikumlarda faoliyat yuritayotgan o‘qituvchilar, metodistlar va amaliyotchi pedagoglar, ta’lim sohasida innovatsion yondashuvlarni joriy etishga qiziquvchi mutaxassislarning ilmiy salohiyatini namoyon etuvchi maqolalari eʼlon qilinadi.

              Muassis Termiz iqtisodiyot va servis universiteti nodavlat ta’lim muassasasi hisoblanadi.

1.2. Mazkur Nizom “TISU Ijtimoiy fanlari va innavatsion pedagogika” jurnali (keyingi o‘rinlarda matnda “Tahririyat” deb yuritiladi) faoliyatining tashkiliy, iqtisodiy, huquqiy va ijtimoiy asoslarini belgilaydi.

1.3. “TISU Ijtimoiy fanlari va innavatsion pedagogika” jurnali tahririyati O‘zbekiston Respublikasi Konstitutsiyasi, “Ommaviy axborot vositalari to‘g‘risida”gi Qonun, muassis tomonidan tasdiqlangan Nizom asosida faoliyat yuritadi.

1.4. Tahririyat o‘z faoliyatini amalga oshirishda kasb mustaqilligiga asoslanadi va muassis bilan doimiy hamkorlik qiladi. Amaldagi qonunlarda, mazkur Nizomda, ta’sis shartnomasida nazarda tutilmagan hollarda Muassis tahririyat ishlariga aralashmaydi.

1.5. “Ommaviy axborot vositalari to‘g‘risida”gi Qonunga binoan jurnal materiallari senzuradan xolidir.

1.6. Nizom Termiz iqtisodiyot va servis universiteti Ilmiy Kengashining 2025-yil 28-avgustdagi 1/5.5-sonli yig‘ilish qarori bilan tasdiqlangan.

 

1. MUASSISNING HUQUQLARI VA VAZIFALARI

2.1. Muassisning ommaviy axborot vositasini ta’sis etish bilan bog‘liq barcha harakatlari, ularning huquqlari, maqsad va vazifalari, davlat hamda jamiyat oldidagi mas’uliyati O‘zbekiston Respublikasining qonunlari asosida belgilanadi. Muassis, noshir va tahririyat o‘rtasidagi ishlab chiqarish, mulkiy va moliyaviy munosabatlar O‘zbekiston Respublikasining amaldagi qonunlariga mos ravishda tuzilgan ta’sis shartnomalari asosida o‘rnatiladi.

2.2. Muassisning huquq va majburiyatlari:

Muassis quyidagi huquqlarga ega:

- ta’sis shartnomasi, Nizom va qonun hujjatlarida, shuningdek u bilan tahririyat o‘rtasida tuzilgan shartnomada belgilangan vakolatlari doirasida ommaviy axborot vositasining ishlarini boshqarishda ishtirok etish;

- qo‘shgan mulkiy ulushiga muvofiq ravishda foyda va zararlar taqsimotida ishtirok etish;

- ommaviy axborot vositasini muassis yoki uning tomonidan ko‘rsatilgan uchinchi shaxs manfaatlarini ko‘zlab qonun hujjatlariga muvofiq boshqaruvni amalga oshirishi lozim bo‘lgan boshqa shaxsga (ishonchli boshqaruvchiga) mulkiy majmui sifatida ishonchli boshqaruvga topshirish;

- ommaviy axborot vositasi muharririni (bosh muharririni), shuningdek tahrir hay’ati a’zolarini tayinlash va ozod qilish;

- eng katta hajmi va e’lon qilish muddati tahririyat nizomida yoki ta’sis shartnomasida belgilanadigan xabarni yoki reklama tusida bo‘lmagan materialni o‘z nomidan bepul joylashtirish;

Muassis quyidagilarni bajarishi shart:

- ommaviy axborot vositasining Nizomini tasdiqlash;

- ommaviy axborot vositasi tahririyati bilan shartnoma tuzish;

- ommaviy axborot vositalari to‘g‘risidagi qonun hujjatlariga rioya etilishi ustidan nazoratni ta’minlash.

Muassis senzurani amalga oshirishga, retsenziyadan o‘tkazishga yoki tahririyatning ijodiy faoliyatiga aralashishga, shuningdek, ommaviy axborot vositasining ishlab chiqarilishi va tarqatilishi masalalariga aralashishga haqli emas, ta’sis shartnomasida yoki Nizomda nazarda tutilgan hollar bundan mustasno.

Qonun hujjatlariga muvofiq muassis boshqa huquqlarga ham ega bo‘lishi va uning zimmasida boshqa majburiyatlar ham bo‘lishi mumkin.

- tahririyat ishlarini olib borish uchun bosh muharrir tavsiya qilgan bosh muharrir o‘rinbosari, mas’ul kotib, muharrir, dizayner, musahhih va kompyuterda teruvchi, sahifalovchini ishga qabul qiladi, tahririyatning shtat jadvalini belgilaydi va budjetdan tashqari mablag‘ hisobidan maosh bilan ta’minlaydi;

- jurnalni onlayn chop etish bilan bog‘liq bo‘lgan harajatlarni oldindan to‘lashni o‘z zimmasiga oladi;

- alohida xizmat ko‘rsatgan xodimlarni moddiy va ma’naviy rag‘batlantirish, hukumat mukofotlariga taqdim etish;

Jurnal tahririyatining amaliy faoliyati muassislarning o‘z burch va vazifalarini belgilovchi asosiy omildir.

Muassis tahririyatning kasb mustaqilligi doirasidagi majburiyatlari uchun javob bermaydilar. Tahririyat muassisning kasb mustaqilligi doirasidagi majburiyatlari uchun javob bermaydi.

 

III. “TISU IJTIMOIY FANLARI VA INNAVATSION PEDAGOGIKA” JURNALINING MAQSAD VA VAZIFALARI

3.1. “TISU Ijtimoiy fanlari va innavatsion pedagogika” jurnalining maqsadi: ijtimoiy fanlar va pedagogika sohalarida olib borilayotgan zamonaviy ilmiy-tadqiqot natijalarini onlayn nashr etish orqali ilm-fan va amaliyot o‘rtasidagi uzviy aloqalarni mustahkamlash hamda ta’lim tizimida innovatsion yondashuvlarni keng joriy etishga xizmat qilishdan iborat. Jurnal ta’lim va ijtimoiy sohalarda olib borilayotgan nazariy va amaliy izlanishlarni birlashtirgan holda, professor-o‘qituvchilar, tadqiqotchilar, doktorant va magistrantlar, shuningdek, amaliyotchi pedagoglar uchun ochiq ilmiy maydon yaratadi. Unda nafaqat ilmiy maqolalar, balki innovatsion pedagogik texnologiyalar, ilg‘or tajribalar, dolzarb ijtimoiy muammolar tahlili va ularning yechimlari ham yoritib boriladi.

Mazkur onlayn nashr “Ta’lim to‘g‘risida”gi Qonun hamda oliy ta’lim va ilm-fan sohasidagi qonun-qoidalar asosida talabalar o‘rtasida barcha fan yo‘nalishlari bo‘yicha ilmiy-tadqiqot ishlarini olib borish, ularning ilmiy fikrini shakllantirish va rivojlantirish, shuningdek, milliy va xalqaro miqyosdagi dolzarb ilmiy masalalar, ilg‘or nazariyalar, zamonaviy metodika hamda amaliyotni hayotga tatbiq etishda faol tashabbuskorlik ko‘rsatishdan iborat.

1. NOSHIR

4.1. Muassis, tahririyat va noshir o‘rtasidagi barcha ishlab chiqarish, mulkiy va moliyaviy munosabatlar amaldagi qonunlar va o‘zaro tuzilgan shartnomalar asosida o‘rnatiladi.

1. ISHLAB CHIQARISH VA MOLIYAVIY FAOLIYAT

5.1. Tahririyat O‘zbekiston Respublikasi Oliy ta’lim, fan va innovatsiya vazirligi hamda Termiz iqtisodiyot va servis universiteti nodavlat ta’lim muassasasi muassisligida tashkil etilib, universitet tarkibida faoliyat yuritadi.

5.2. Tahririyatning huquqiy manzili: Surxondaryo viloyati, Termiz, Yulduz MFY, Ibn-Sino ko‘chasi, 38B-uy.

5.3. Mulkni hosil qilish manbalari quyidagilardir:

-onlayn nashrdan tushadigan mablag‘lar;

- obunadan tushadigan daromad;

- bank va boshqa kredit beruvchilarning kreditlari;

- qaytarilmaydigan va hayriya badallari, tashkilotlar, korxonalar va fuqarolarning beg‘araz moddiy yordamlari;

- homiylardan tushgan mablag‘lar;

- ushbu Nizomda belgilangan faoliyatlarning amalga oshirilgan barcha turlaridan tushgan mablag‘lar;

- qonunlarga zid kelmaydigan boshqa manbalar.

5.4. Tahririyat ishlab chiqargan mahsulotlar va boshqa qonun-qoidalarga hamda muassis bilan tuzilgan ta’sis shartnomalariga zid kelmaydigan faoliyatlardan tushgan daromadlar, muassis bilan kelishilgan holda va u bilan tuzilgan shartnomalar asosida taqsimlanadi.

5.5. Tahririyat jurnalning bir soni narxini, shuningdek, u bajarayotgan boshqa ishlar va ko‘rsatilayotgan xizmatlar bahosini muassis bilan kelishgan holda belgilaydi.

 

1. TASHKILIY MASALALAR

6.1. Tahririyat ijodiy, ishlab chiqarish, tijorat va moliyaviy faoliyat bilan bog‘liq asosiy masalalarni tahrir hay’ati yig‘ilishida ko‘rib chiqadi va hal qiladi.

6.2. Tahrir hay’ati tarkibiga: bosh muharrir (rais), bosh muharrir o‘rinbosari, mas’ul kotib va tahririyatning ayrim a’zolari, muassis, jamoatchilik vakillari kirishlari mumkin.

TISU rektori - “TISU Ijtimoiy fanlari va innavatsion pedagogika” jurnalining Bosh muharriri hisoblanadi.

Tahrir hay’ati tarkibi (bosh muharrirdan tashqari) va undan boshqa o‘zgartirishlar bosh muharrir tavsiyasiga ko‘ra Termiz iqtisodiyot va servis universiteti nodavlat ta’lim muassasasi rektori tomonidan tasdiqlanadi.

6.3. Tahririyat kengashi jurnalning ijodiy, noshirlik, tijorat va moliyaviy faoliyat ko‘rsatishida ko‘maklashuvchi maslahatchilar guruhidir.

6.4. Bosh muharrir:

- tahrir hay’ati va tahririyat jamoasi faoliyatiga umumiy rahbarlik qiladi;

- ta’sischilar, noshir, muallif, davlat organlari, jamoatchilik tashkilotlari, fuqarolarning boshqa hamjamiyatlari bilan bo‘lgan aloqalarda tahririyatning vakili sifatida ishtirok etadi;

- jurnal ehtiyojidan kelib chiqib, barcha ijodiy, texnik va boshqa xodimlarni ishga tavsiya etadi;

- jurnalga taalluqli bo‘lgan masalalarni ta’sis shartnomasi va Nizomga asosan hal qiladi.

6.5. Tahririyat jamoasi - bosh muharrir, uning o‘rinbosari, mas’ul kotib, muharrirlar, dizayner, musahhih va boshqa maslahatchilardan tashkil topadi.

Tahririyat jamoasi o‘z huquqlari doirasiga kiradigan barcha masalalarni umumiy majlisda hal qiladi.

6.6. Tahririyat jamoasi mehnat shartnomasi (kontrakt) bilan ishlayotgan fuqarolardan iborat bo‘ladi.

 

VII. TAHRIRIYATDAGI MEHNAT MUNOSABATLARI

7.1. Mehnat jamoasining mehnat huquqlari va majburiyatlari (burchlari) amaldagi qonun, mazkur Nizom, universitet Nizomi va Ichki tartib qoidalari, Odob axloq kodeksi, lavozimga taalluqli yo‘riqnomalar bilan belgilanadi.

7.2. Bosh muharrir ijodiy xodimlarni ishga qabul qilish bo‘yicha Termiz iqtisodiyot va servis universiteti nodavlat ta’lim muassasasi rektoriga tegishli takliflar kiritadi.

 

VIII. “TISU IJTIMOIY FANLARI VA INNAVATSION PEDAGOGIKA” JURNAL NASHRINING TO‘XTATILISHI

8.1. “TISU Ijtimoiy fanlari va innavatsion pedagogika” jurnalni onlayn nashrdan chiqarilishini to‘xtatib turish yoki tugatish muassis arizasi asosida sudning qaroriga ko‘ra amalga oshiriladi.

Muassis ommaviy axborot vositasining chiqarilishini tahririyat Nizomida yoki muassis va tahririyat o‘rtasida tuzilgan shartnoma (kelishuv) asosida o‘rnatilgan tartibda to‘xtatib turish yoki tugatishga haqlidir.

8.2. “TISU Ijtimoiy fanlari va innavatsion pedagogika” jurnali muassislar qarori bilan to‘xtatilgan taqdirda ishdan bo‘shagan xodimlarga nisbatan qonunda ko‘zda tutilgan barcha mehnat kafolati huquqlariga rioya qilinadi.

 

1. YAKUNIY QOIDALAR

9.1. Mazkur Nizom muassislar tomonidan qabul qilinadi va tasdiqlanadi;

9.2. Mazkur Nizom tasdiqlangan kundan e’tiboran kuchga kiradi;

9.3. Nizom va Ta’sis shartnomasi bir-birini to‘ldiradi;

9.4. Ushbu Nizom o‘zbek tilida, teng huquqiy kuchga ega bo‘lgan uch nusxadan iborat.